不能否認, 共產黨係成功的.

相信係五週年紀念果陣, 無香港人, 會話六四無死人, 政府無錯.

到六四十週年, 可能有少少聲音, 提出政府係有苦衷, 為左發展迫不得爾.

今年六四二十年, 係中國所謂最自由的地方, 我地新一代對六四點睇呢?

有人話人都死左, 平反完六四又點? 懷疑六四有無屠城? 中央鎮壓六四, 令經濟可以更進一步發展? 死左幾千/幾百, 而換得20年穩定, 值得? 學生根本係動亂, 打死唔少解放軍? 甚麼民主不能一步到位...?

近日, 見到有唔少80s後出生的後生仔女, 係六四論壇提出各膠論:

其實, 要唔要平反六四呢?

有人可能會話, 人唔死都死左, 平反有乜用, 不如向前看. 當然, 針唔急到肉, 你唔會知痛. 如果, 你係天安門母親, 你聽到人咁講, 你點諗呢? 人係死左, 係唔係都要俾返個公道學生呢?

有人話六四鎖壓之後, 國家更穩定, 經濟發展有目共睹. 但係, 如果唔鎮壓, 國家會唔會更開明呢? 會唔會少左貪污呢? 會唔會巳經係一個先進國家呢?

學生係有責任.不過, 殺人兇手都未出來認錯, 受害者的學生, 死左都要跳返出來認錯嗎?

小朋友做錯事, 我地都會叫佢地認錯. 點解, 國家做錯事, 唔可以認錯呢?

如果, 你真係覺得, 開槍殺學生的國家無錯, 你個良心係邊度呢?

你如果覺得國家做錯可以唔認, 死去的人死左就算, 唔使平反, 你仲有無是非之心呢?

人到左不分是非, 埋沒良心果陣. 仲係唔係叫做人呢?